對不起哦

Tuesday, 27 September 2005

冷落呢邊喇，實在已經頂唔順 motime 忽然亂碼同埋突然字體變細，如果唔係一向當慣呢邊係我既「垃圾桶」，我一早就「手起刀落」咗喇！

話說，20 號嗰日，為咗不讓小甜甜龔小姐專美，我同廢柴哥都上演過一單「爭產案」。
咁，邊個贏？呵呵，且聽我說：
sa：「22 同 23 號我要放假，男友生日。」
柴：「23 號下晝我都要放喎（星期五陪女友例假）。」

補充一句，老細一向冇所謂啲馬邊日放乜假，但總之要有個人響度撐場。

sa：「你有乜事呀？不如放少次啦。」
柴：「唔得呀。妳放 21 號，23 號下晝返嚟啦。」

屌，你邊撚個呀，我放邊日假洗你嚟安排？

sa：「唔得喎，放 21 號太趕！我未準備得切喎！」
柴：「唔。唔得。」

傾唔掂，惟有僵持。

sa：「咁閣下嗰日到底有乜要做呢？」
柴（欲語還休）：「總之唔得，妳早啲講都或者重可以。」
估唔到佢呢句話竟然，忽然，為我帶嚟曙光！
sa：「咦！我真係一早講咗架喎！」

柴意圖發聲，我已經大大聲擰轉身同隔離組負責編更同事講：「美麗妳話嘞，我一早講咗自己要放假架！」
美麗（雙目精光一閃）：「係～～呀～～妳一早叫我唔好編妳更嘛嗰幾日！一早講定晒咁！」
估唔到連隔離組老細都和應：「係啦！sa 妳洗唔洗咁冤氣呀！全 office 都知妳要放假陪男友啦！一早講定晒慌死人唔知咁！」

我緩緩擰返轉頭望住柴哥。

柴：「咁……好啦，妳話妳一早講咗，妳放啦！」
sa（甜笑）：「thank you！」

嗱，其實我真係一早講咗架，不過嗰陣時早咗成個月，其實都預咗柴哥唔會記得架，要 re-confirm 先有得放……但鬼叫柴哥鬼拍後尾枕，自己指咗條生路俾我行咩！
所以話，係你既，始終係你既！

不過我既同事又真係特別精靈咗啲囉！哈哈哈哈～～