ASASA livly 樂園

　
　
　
　

•  

又好返

雖然覺得很累，但昨晚吃盡藍莓芝士蛋糕咖啡下午茶吹水四粒鐘後打冷鵝件鹵水大腸炒蜆蠔仔粥蠔餅椒鹽九肚魚韮菜豬紅腐乳炒通菜，再加在溫馨貓屋無憂無慮睡上六小時，今天心情又回好一點點。

真係冇端倪。古怪。

By asasa at 07:52 | link | comments | fooood, looove

轉更

屋企又家嘈屋閉，我想問有冇人知道點醫男人自我中心躁狂症同埋女人酗酒兼抑鬱被害妄想自以為是引致一秒重覆同一句嘢兩次？

最好笑一句：「對唔住，你哋冇 XX。」
我想講，我一向唔恨有 XX。

如果成功轉型為夜更人士，我真係要嚴重考慮搬出嚟住。
對住你兩條友，遲早首先黐撚線既係我。成 Q 日半夜三點半搵交嚟嗌。麻尻煩。

By asasa at 10:52 | link | comments (2) |

好撚驚呀

廢柴今朝竟然……早到！係咪世界末日呀？

重要個收音機跳掣（我哋要錄嘢），明明部機近我，佢無端端兜一大個圈過嚟按掣呀！

喂佢琴日重係扮撚晒聽唔到老闆電話重要係已經走咗過去老闆張枱度但都只係響張枱扮尻晒整嘢焗住要我接電話架喎！

究竟琴日我放咗工之後發生咗啲乜嘢事呀？？？！！！

By asasa at 07:25 | link | comments (2) | joooob

咁既心情

浴缸講得啱，「對住個咁既人，做出嚟既嘢又點會好？」

偏偏，工作地方可以由自己揀，但同事上事老闆下屬甚至茶水掃地阿姐……都唔輪得到你話事。

對住啲西人，我會努力練高自己 EQ，然後化怒氣為力量，面試時就會份外精靈！

NEVER SURRENDER！！！！！！

p.s. 賤老闆響走廊同我迎面而遇，我冇望佢，feel 到佢臨最後嗰秒都重等緊我向佢笑……！黐撚線，你唔係以為跣咗我一鑊，我重會好好面口對你嗄哇？！

By asasa at 07:40 | link | comments | joooob

莎巴馬來西亞餐廳

朋友仔帶我去謝菲道食嘢，好味！
叫咗油鬆餅、羊肉咖哩、炒超細菜苗，最後叫個拉茶（鬍鬚師傅即場企響你隔離拉架），嘩！完美既一餐！

友話海南雞飯都好好味喎！下次多啲人的話再食～～

同埋不得不提：服務超好，係超好，同埋環境乾淨！

死死團快啲行動啦！

By asasa at 09:19 | link | comments (5) | fooood

唔好咁撚嘈

慈禧太后遊畢東瀛返港，屋企噪音指數又飆升至測量儀讀唔到既高指數。
手信係百幾蚊一大包漬藍莓乾，甜，但好味。睇上去似有九百粒「白鳳丸」，如果以香港新鮮貨五十蚊一盒三十粒嚟計，抵。
大帝不停埋怨同行朋友左彈右彈獨裁唔就人，搞到旅途不愉快。
老實講，我心裏面只講一句：「抵！」
有時呢啲冤屈氣，如果唔係你自己貪心想討好全球人類扮撚晒嘢、博人哋將來可能有嘢益你所以唔敢得失人，你．根．本．唔．洗．受！
畀着係我，一定笑吟吟明寸：「好，你大少奶今日唔食生冷嘢我哋唔去食壽司，咁聽日由我話事！──噢，我哋一齊去旅行，大家都畀咗機票錢，你唔係諗住乜都就晒你嗄哇？！」
唔肯「衰」，有時唔等如「有禮貌」or「客氣」，呢啲叫鵪鶉、咎由自取。

anyway。

心血來潮搵舊相簿，得返十零張舊相（已經明顯大個咗彩色未褪既唔計），連啱啱出世嗰咋都唔見。可能上次屋企水浸時丟晒……。唉。冇計，惟有將殘餘物資抽起，變黃晒嗰啲會拎去相舖修復，或者順便燒隻碟。
其實我一啲都唔戀舊，相呢家嘢，其實只係一路堆積到我死嗰日，五年先拎出嚟一次回味吓。
但……

響相裏面再見返爺爺，心裏面，一陣溫暖。

雖然，眼濕濕。

By asasa at 10:21 | link | comments (5) |

無賴

買咗啲嘢諗住 send 畀兩位海外網友。希望佢哋鍾意啦！即場響公司砌盒（喂，我早咗返公司架，仲係午餐時間架！），同事眼神古古怪怪，十成十我單嘢已經傳開晒。
啍，咁又點？我又唔驚畀人炒。
砌好兩「箱」嘢，嘩，都幾墜手吓，唔知郵費要幾錢？

諗起英國長大既日裔同學仔 ellie 響電郵裏面同我講過：「sa，我覺得妳太想對人好。其實人生在世，無論對情人、朋友、同學，你都無需要對佢哋太好。佢哋有回應，fine，但人際關係，講既係互動。」（not in exact wordings）



係囉呵。
連我都唔知，到底自己係一個點既人。
到底我連種「好就好好、唔好就永世唔見」既表現，係天生母性強鍾意照顧關心人，抑或將「對你好」當做手段所以如果失敗就即撇免嘥彈藥？？？？？？

可能，討好別人，都係一種另類既「討好自己」？！

我好憎精神分裂既自己。

By asasa at 12:08 | link | comments (2) |

asasa 的成分

命運的相逢：36.80%
大宇宙的意志：28.67%
天下第一舉世無雙絕對無敵真正非常超越超級震古鑠今空前絕後刀槍不入無堅不摧無所不能好厲害：25.75%
化屍水：3.86%
夢：3.86%
性慾：0.64%
毒電波：0.43%

分析你的成分：http://kutar.l2p.net/promo/component_check.php

姑且唔好理長到黐撚線嗰句係乜，我首先要反對「性慾」嗰 part。

有冇可能佔咁少呀？

By asasa at 23:21 | link | comments (9) | gaammes

燒烤後感

承蒙各位不嫌棄山長水遠入到隔十五分鐘就有解放軍既喪僻地區烤嘢！

狂買一輪食物（零食佔半）之後，就齊齊搭小巴「返大陸」。
warm up 十數分鐘，同啲狗 hea 吓，就由一眾猛男（well，我主要係指我老豆）負責透火起爐！
因為天氣極之潮濕，柴又濕，無奈地「起唔到」（好大鑊！）……女人們就手 fing fing 呆立賞花（有咩？唔係得樹咩？）……
唔知搞咗幾耐，終於啲濕柴少咗火花（之前勁爆火屎彈到周街係兼夾全部香腸墨丸黐晒炭粉），燒得喇！除咗例牌薯片伉儷肉麻低能打情罵俏，純情小羚羊爆惹笑問題之外，仲加插重頭戲「狗狗愛男人」（真係淨係愛男人  ……），以及為我個印傭慶祝生日切蛋糕。

好彩天氣唔差，一陣陣風吹嚟，用電腦播住歌，抬頭望到月亮……差啲以為係中秋節 BBQ 團。

食完都冇乜時間玩餘興節目，十一點大家拉大隊返歸。辛苦晒你哋喇！

By asasa at 08:48 | link | comments (4) | fooood

細路

TO 人哋個男人

你唔好以為我識你女人唔算耐、你又未必睇我 blog，我就唔夠薑出聲
我話你知
你唔好再咁天真無邪，以為你覺得冇事既嘢，你女人都會覺得冇事
唔該你略為運用吓個腦，or 起碼用吓你對眼，睇吓現實
而家就係擺到明你女人頂某啲嘢唔順，好 Q 辛苦
唔該你唔好再扮晒樂觀天真大快活，繼續覺得你嗰種生活模式可以套落你女人身上
你想同佢結婚吖嘛？係咪？OK，我一向唔會 comment 我啲女性朋友既擇偶條件
咁唔該身為佢男人既你自己諗吓，做一個女人個丈夫的話，你，點樣可以令佢開心過一世？！
同一個人一齊，唔係要個女人用你用同一種思維模式去諗嘢，而係大家搵個思想、情感、生活習慣平衡點
你再係咁樣自己以為冇事既嘢就繼續做，只會令你身邊嗰個人唔開心
其實我唔太明你點解你明知你女人唔鍾意，你依然堅持去做某啲事，呢一點你唔撚洗解釋，我估係人見到／聽見呢種情況都會扯火
做你女友已經犧牲咁大，我唔知你有冇面目叫佢做你妻子！
希望鍾意「大事化小」既你，識得內疚吓！同埋真係內疚的話，就做返啲嘢令你女人開心！

我知我冇資格多管閒事，以上只係我非常個人兼夾片面既觀感，唔認同既人請隨便開口聲討我。

from 人哋女人既多嘴朋友

By asasa at 08:39 | link | comments (2) |