ASASA livly 樂園

　
　
　
　

•  

飽到呢

法包、鵝肝醬、火腿芝士、蜜糖腸、脆米花生醬、香魚醬、香辣海鮮味薯片、罐頭蜜桃、煙三文魚、麥餅乾、玫瑰紅酒、石榴汁伏特加、茄汁焗豆、蒜味花生。

睇埋＜transamerica＞。

仲要中途突然接超勁趕 freelance，即借安安電腦一粒鐘起貨，咁就五百大元袋袋平安！

我愛死死團！

By asasa at 21:59 | link | comments (2) | fooood

雞煲

屋企又食火鍋，雞、豬粉腸、豆腐、金菇、油麥菜、白菜仔、杞子、蒙牛肉、豬肝、「好到底麵家」豬肉鮮蝦筍絲魚皮餃！

好味到呢！

By asasa at 20:26 | link | comments | fooood

愛你變成恨你

恨，當然唔等如愛。
但冇愛，一定冇恨。

恨，因為愛被剝削。

關於感情，人人都心知肚明。

By asasa at 17:59 | link | comments | looove

厚皮

琴日望住廢柴，真係好撚好笑。
首先，新同事係同佢同 grade 同期，於是佢就趁我哋 lunch 大食會時閃過去同人懶熟，貫徹佢平時慌死人唔知佢識好撚多人既核突本色。
不過咁都未算，柴哥食食吓雞翼意粉薄餅呢，就黐埋咗去大老闆度喎！仲傾到談笑風生添！
今朝佢忽然比平時早十分鐘（註：都係遲到！）返到公司，哦，可能唔想「熟人」見到佢啲劣跡啦！

聽住＜千禧年代＞，有位德信工友話：「判上判都係個制度，冇所謂既，最緊要係有奸賊（監察）！」

By asasa at 07:50 | link | comments | joooob

戇尻尻

因為連埋另一組人搬過嚟，所以我哋 office 大執位。咁啱隔離組有個食物箱，搬咗過嚟我附近。
50 歲 wet 妹言之有物咁同我講：「sa，睇住個箱，唔好俾人偷食呀！」
唔夠五秒，廢柴就走咗過嚟，將個箱「晾」響我塊 partition 板個位大模斯樣咁拎嘢食，仲問我食唔食！
我黑面：「唔．食！」
柴：「點解呀？」
我冷 + 不屑：「人哋組架個箱！」
柴：「大家一齊食格！唔係咩？」
廢柴又分俾中層，得逞後又食又拎，閃返埋位。
我電話響：「喂？」
「妳做乜咁人偷食呀！叫咗妳睇住架啦！」
「有乜計啫！人哋仲叫我食呀！挑！」
「好，即刻搬竇先！」
收線，wet 妹拎走個箱。
廢柴隔咗陣又咋啲依行過嚟我嗰邊，自己同自己講：「吖！個箱呢？頭先仲響度格！」
戇尻尻中層：「係喎！十分鐘之前仲響度格！去咗邊呢？」

你話吖，有呢種同事幾幸福呢！

By asasa at 10:38 | link | comments (3) | joooob

激死

條茂利藝術要人話仲有三個 file 要譯，計落而家我每篇嘢得返三百蚊，頂！平均每篇嘢成八版紙架大佬！想點呀！

講返轉頭，做呢個 job 惟一益咗我既，係我忽然好自然地會成日睇英文電視／ICQ 時打英文囉！

佢話「希望」四月頭俾錢我，但到而家都未 send file 嚟喎！真係唔知算點！你忙你病，我夠係咯！

By asasa at 13:40 | link | comments (3) |

雜碎

終於扑槌決定和少爺在五月旅行，不知去哪兒好，因為大家都沒所謂；在考慮之列的地點有：泰國、關島、東京、台北。新加坡太悶，上海不熟悉，北京……暫時不想觀光。
少爺最熟泰國可以揼骨惟獨新鮮感欠奉，台北大家都未去過但怕我吃不到東西，東京少爺已約了朋友去但他不介意再去而我未有購物慾，關島就很想去但怕貴而且不知道有甚麼旅行社較好。
所以不知怎樣揀！


anyway，我終於做了 livly GLL 會員了！（其實都已經一個禮拜）可以買特定島、飼料、飾物……
當然，我已去了研究室泡藥水，變成新 DJ 寵啦！呵呵～～（不過公司 show 唔出我隻嘢！）


化錢女梗係即刻狂買會員限定昆蟲（白色好似蒲公英嗰隻就係變細蟲啦！本人喪餵中）

By asasa at 10:40 | link | comments | liiiife, livly - transformation

賣身

近來只是不停賣廣告，印的都起了貨，很閒，覺得自己跟廢柴日漸同化。
新工沒聲氣，高層昨天遞來續約文件。
是，我的年終評核工作表現上總是「very efficient」一格被剔，難道會留不低嗎！？
一看合約，薪金沒增（好彩沒減 ），但因為已是第三年，年假一加就是多三日！勁喎！
我這份工，說好？冇得升，冇錢加，冇嘢學，長做下去會成為苟且專家，切合外面公司對我等類型打工仔的負面期望；
說不好？糧準工時「實」，加班一秒都可以補返，沒有公司政治（因不關我事），老闆同事福利環境都算不錯，上班或午飯時間遲到少少都不會有人理。而且近名店 。
我很怕它的不好，又很愛它的好。是以一直有留意新工作，但面試時肯定不會顯得盛意拳拳。

聽說巨蟹座有一大問題：懶！

是。我又怕由低捱起又怕冇前途但始終踢一踢先郁一郁猛等好工撲埋嚟我度。我真係徹頭徹尾無藥可救的懶人！！

By asasa at 08:34 | link | comments (3) | joooob

甚麼甚麼

是　是時候對話吧　是寧願吵鬧嗎　你願意吵架嗎　再別冷漠到盡頭靠別人傳話
是　情人像飾物吧　未能合身便不掛　我早已看化　我絕對明瞭當中的變化

從未說起　大家都心知該要說別離
然而做戲　我都感激你有心機
從未忘記　你戀愛像遊戲　你拖我下去仿似不捨不棄　為何用法寶

留住我　我想知你為何　你根本愛甚麼　甚麼　甚麼
想我們也許全因只顧面子　一切也在拖　其實曾盡過努力沒結果
情沒法拖　我早知道為何　你都知道為何　一早不愛我

延續鑽禧　是否真的可保證變傳奇
延續遊戲　我真的給你看得起
其實和你　有一個被忘記　至可以讓我真正看到空氣　為何用法寶

留住我　我想知你為何　你根本愛甚麼　甚麼　甚麼
想我們也許全因只顧面子　一切也在拖　其實曾盡過努力沒結果
情沒法拖　我早知道為何　你都知道為何

一早不愛我

By asasa at 09:47 | link | comments | looove

粥

事件一

廢柴和病了的友人吹晒水。（相信我，我一點都不想聽，只是人家聊天聊得太暢快聲浪過大，忘記了自己不是在扮傾公事電話）
掛線後，柴又打電話不知在問甚麼。
這陣子公司執位，另一組人搬來，柴竭力以其蘭花手左執右執，櫻桃小嘴一邊在嚷：「唉，好多嘢要我執，執極執唔完。」顯示我組沒有了他會淪陷云云。anyway，傾完電話，他又扮執嘢。
搬搬吓，專注工作既佢忽然問中層廢柴：「呢度附近邊度有得食粥？」
戇尻尻中層：「粥呀？」
柴：「係，粥，ｘｘｘ（日文），ｘｘｘ（不知何種語言），congee！」
中層（聽不懂柴氏語言）：「哦，粥呀，……邊度邊度，直行轉右……飯呢，就樓下都有。」
柴：「超！飯樓下有我夠知啦！樓下冇飯有乜呀？！唔通冇飯食呀！」
第一，我真係唔知有個語言奇才響我身邊，我想問有冇人知點樣提名人去諾貝爾文學獎？
第二，中層係蠢啲，但話晒都大你廿幾年兼職位資歷高過你，唔該啲冇家教人檢點啲囉！

事件二

柴：「ｘｘ（中層）呀，個ｘ字點打呀？」
中層：「咪咁咁咁打橫打戙囉！」（例牌唔清唔楚）
柴：「嗄，咁即係咁咁咁？」
「唔係，係咁咁咁，柱心邊……」
「即係咁咁咁，石字邊？」
佢兩條嘢 up 一大輪，我忍唔撚住爆一句：「係刀字邊呀！」
柴：「啊！係喎！」然後一邊打字一邊笑：「哈，咁淺既字都唔識，又俾 sa 笑我中文渣喇！」

黐尻線。

By asasa at 09:05 | link | comments (3) | joooob

水滴好惹蟻

為慶祝日本白色情人節，水滴官方於 3 月 10 號先推出棉花糖朱古力牛奶杯，前天變成水滴肖像粉紅、白朱古力，再變成昨天的曲奇餅。
哈，今天一看，有一點黑色小小的東西在動……嘩！螞蟻搬餅屑！
用放大鏡，還見到小小的綠色地底蟻窩口！厲害！
比起情人節悶死人的紅色心心燈牌，這隻蟻哥有趣多了！抵讚！

  自製連環圖（最右邊溶了的聖誕雪人生了朵白花！）

  不用過冬，還是那麼辛勤啊？！

By asasa at 13:08 | link | comments | mero

死死浴足團後感

難忘處女下海的尖嬌笑聲……真的久違了，多謝安姐！

小米不要為人哋老母太煩了，等如「長命工夫長命做」，「長氣老人慢慢 deal」！

真好，兩老回大陸省親去，放工後我會急急腳返屋企享受寧靜週末。打個盹，吃點味精烏冬，看看電視，做我的快樂廢人！呵呵呵呵～～

By asasa at 07:57 | link | comments (1) | liiiife

圓滿

搞掂晒啲藥，又搞掂晒秘撈，而家日日等收支票。

響《milk》雜誌見到自己既文字，原來都幾開心。嘻。（低能）

好嘢，今日死死團搞浴足聚會，好期待～

p.s. 忍唔住都係要講句，雖然我本身都唔算最最大方得體品格完美嗰種人，不過我真係唔明點解有人次次離開自己個位都任得自己張凳成條屍咁攤響條狹窄通道正中央咁冇 manner 囉！

By asasa at 06:53 | link | comments (1) | liiiife

藍眼鏡日

昨天拿到新眼鏡，是藍框粉紫底臂的，今早被人一讚，立即心情大好（低智）。

廢柴在「省」女友沒接他電話又不覆電。
天啊，你看今時今日的「男人」，真是太令人感動了，自己在辦公室太「忙」，於是有心情埋怨開工中的女友不回他一個電話！

大家應明白我為何寧願單身。

By asasa at 10:40 | link | comments (2) |

載譽歸來

廢柴「榮休」完返嚟（啋，人哋話「年年生日我都要放假架！〔加蘭花手〕我生日唔放假會死架！），又施展佢既扮忙功，行出行入，蹲低起身。
我做緊嘢忙到腳都跳埋上嚟做都唔掂，佢就忽忽地飄飄然 S 形咁行過嚟：「sa 呀，我見到份嘢某句咁咁咁，我會覺得改成點點點好啲……」
我（齋望電腦熒幕）：「俾你做吖！」
柴（呆 + 驚）：「嗄……」
我：「唔係講笑，我好多嘢做，呢單嘢不如比你嘞。嗱（拎起一疊文件），交晒俾你。」
柴（噓口氣）：「咁～～好啦～～」

真係得閒死都唔得閒病，你咁八卦，咪你做晒囉！我有乜所謂啫，係咪？

By asasa at 13:50 | link | comments (3) | joooob